Plumeru La Pampa fuera d’Asturies

PlumeruLaPampaFueradAsturies
Lluchando Pola Soberanía, iniciativa de movilización de la izquierda soberanista asturiana, tien el gustu de convidavos a participar na campaña “Plumeru La Pampa fuera d’Asturies, pola defensa’l territoriu y la soberanía ambiental”, na que apuntando pa la invasion del plumeru La Pampa queremos señalar non solo pal desastre ambiental que suponen esta y otres invasiones vexetales y animales, sinón tamién pa los problemes estructurales que carecemos nel nuestru país, como l’abandonu de lo rural -como llugar y como mediu de vida- y la especulación urbanística, que nun dan más que facilidaes a esti y a otros desastres ambientales.

Pa too ello, amás del manifiestu que vos convidamos a firmar y esparder, tenemos preparaos dellos materiales de difusión (cartelería, trípticu guía y más) colos que vamos faer por llegar a tolos puntos posibles del país, con atención especial a les zones afectaes pol plumeru La Pampa.

D’esta manera, convocamos presentación de campaña esti domingu 25 de xunu, a les 11:30, nel Área Recreativa de San Andrés de Los Tacones (Xixón), pa siguir con una acción de desaniciu de plumeru nel Polígonu ZALIA y finar con una parrillada nel área recreativa de San Andrés.

De cara a l’acción, amás de guantes y ropa afayaízo, quien pueda ha de traer ferramienta pa compartir: fesoria, palote, pala, tisories cortasetos, esbrozadora, etc.)

Axuntamos llocalización y horarios de tren  hasta la estación de Montiana, dende la que se puede dir a San Andrés nun paséu fácil de 3km en bici o caminando.

Contactu (pa confirmar asistencia a la comida, pa faer el trayectu dende la estación en coche, o pa cualquier duda o consulta):

lluchandopolasoberania@gmail.com

Llocalización:
https://goo.gl/maps/5JAtZEUt1SF2

Avilés
Salida 10:43 llegada 11:16 (tresbordu Villabona)
L’Entregu
Salida 09:50 llegada 11:16 (tresbordu Uviéu)
La Pola L.lena
Salida 10:10 llegada 11:16 (tresbordu Uviéu)
Uviéu
Salida 10:55 llegada 11:16
Xixón
Salida 10:30 llegada 10:39

MANIFIESTU POR UNA ASTURIES LLIBRE DE PLUMERU LA PAMPA Y ESPECIES INVASORES

Nuna Asturies na que’l mapa demográficu avanza imparable escontra una concentración absoluta de la población nes árees urbanes, el desapegu de les asturianes pola tierra y el mediu entama a ser patolóxicu, dexando vía llibre a toa triba de desastres mediuambientales que nun atopen más resistencia que la d’una población non solo avieyada, sinón lo que  ye muncho más grave, ensin capacidá d’axuntar xente abondo pa organizase en favor del so mediu y de les sos vides. Esto ensin cuntar cola emigración forciada de la mocedá, que desapega a quienes teníen de ser les futures responsables y cuidadores de la tierra que-yos dio la vida. Esta situación, que nun  ye casual, da vía llibre a los monocultivos forestales, l’abandonu y desaprovechamientu de los montes comunales, la permisividá pa colos vertíos, quemes incontrolaes, infraestructures que desestructuren el mediu, contaminación del aire… en definitiva, a tou tipu d’ataques a la biodiversidá y a los recursos naturales que nos ufre’l nuestru país. Ente toos estos ataques podemos cuntar la falta d’acción énte les especies invasores. Una d’elles, quiciabes la más visible,  ye’l plumeru La Pampa.

La invasión del plumeru La Pampa  ye, amás d’un desastre mediuambiental, un exemplu paradigmáticu de la voluntá nula de xestión de quienes malgobiernen esti país dende les instituciones del Principáu.

Un desastre mediuambiental en cuantu a que ta más que probáu’l carácter invasor del plumeru la pampa y los sos efectos negativos pal ecosistema autóctonu, desplazando especies vexetales, y animales, lo mesmo de terrenos degradaos afectaos pola especulación urbanística, como d’espacios protexíos pol so valir ecolóxicu, asina como de terrenos con un valir potencial pa la esplotación agro-ganadera.

Nesti momentu l’amenaza ta nun puntu críticu, una vez abiertu’l tramu d’autovía Llanes-Unquera que conecta l’autovía del Cantábricu con Cantabria, zona especialmente afectada, facilitando asina l’espardimientu d’esta especie invasora que, gracies a les característiques de les autopistes, espárdese per tola costa.

Nun  ye casual la importancia d’estes infraestructures pal espardimientu del plumeru. De fecho, foi’l propiu Ministeriu de Fomentu del estáu español quien recomendó la sema d’esta especie nos taludes y medianes de les autovíes, nun exemplu claru d’irresponsabilidá, faciendo qu’una especie que yá taba dando problemes na Bahía de Santander tuviere vía llibre p’amenazar tola costa cantábrica.

No tocante a la xestión per parte del Principáu, hai que dicir qu’esta foi de voluntá nula, puestu que los intentos de control del plumeru que se ficieron nel pasáu amosaron ser febles y, nin tan siquiera cuando s’almitió que se paraben los escasos trabayos d’erradicación por falta de presupuestu, se fizo por señalar y pedir responsabilidaes al culpable principal de la invasión: el Ministeriu de Fomentu español.

Por too ello, y partiendo de la base de que los conceyos han de ser actores principales na xestión del so territoriu y de que’l Gobiernu del Principáu d’Asturies ha de sofitar les actividaes d’estos, Lluchando Pola Soberanía y el restu d’organizaciones y colectivos firmantes demandamos que se dean los pasos siguientes de cara al desaniciu del plumeru La Pampa y del restu d’especies invasores:

  1. A los conceyos

Declaración de “Conceyu llibre de plumeru La Pampa y especies invasores”.

Establecimientu de planes de control y desaniciu de les especies invasores nel conceyu.

Informar a les vecines de cuáles son y qué problemes causen les especies invasores.

Collaboración coles vecines afectaes, obligando a les propietaries de terrenos con fines comerciales o urbanísticos invadíos a actuar nel so desaniciu.

  1. Al Gobiernu del Principáu d’Asturies.

Coordinación colos conceyos p’actuar nos terrenos baxo la so dependencia.

Collaboración económica y de medios colos conceyos.

Señalar la responsabilidá y desixir el pagu de los costes del desaniciu del plumeru La Pampa al estáu español.

Col enfotu de que nes midíes adoptaes se pongan per delantre finxos básicos como la creación d’empléu de calidá -nel que se respeten los derechos llaborales y la igualdá de xéneru-, el compromisu real en defensa del mediu -emplegando medios manuales y mecánicos nel desaniciu de la plaga y refugando l’usu d’herbicides- y sorrayando que la solución ta na prevención y anticipación al problema -dando soluciones al despoblamientu rural, fomentando los modos de producción apegaos al mediu y al pueblu y evitando la especulación urbanística-, firmen:

Lluchando Pola Soberanía

N’Uviéu, a 27 de xunu de 2017